Kunywa amazi ni ingirakamaro cyane kuko bifasha umubiri w’umuntu gukora neza. Umuntu ategetswe kunywa amazi nibura Litiro imwe n’igice (1,5 litre) kugera kuri Litiro ebyiri n’igice (2,5 litres) ku munsi.
Bamwe mu nzobere batanga inama zo kureka kunywa amazi mu gihe umuntu arimo kurya. Umunyabutabire witwa Jessie Inchauspé akaba n’umwanditsi w’igitabo yise « Faites votre glucose révolution » yavuze ko atari byiza kunywa amazi mu gihe umuntu arimo kurya ibinyabijumba cyangwa ibinyasukari kubera ko ngo ibi bishobora kongera igipimo cy’isukari mu mubiri kingana na 33%.
Ariko ku rundi ruhande, zimwe mu nzobere zo siko zibibona, zivuga ko kunywa mu gihe umuntu arimo kurya ngo ari byiza kuko ibinyobwa byoroshya ibyo umuntu aba arimo kurya, igihe ibyo biribwa bikomeye cyangwa byumye.
Abenshi mu nzobere bemeza ko umuntu agomba kwirinda kunywa amazi mu gihe hadasigaye byibura iminota mirongo itatu (30mins) ngo arye, ibi kandi akabyirinda kugeza igihe arangirije kurya. Cyakora mu gihe hari abantu bumva bakeneye kugira icyo banywa mu gihe barimo kurya, ngo bagomba kunywa dukeya cyane.
Ni ryari umuntu akwiye kunywa amazi?
Muri rusange ni ngombwa kunywa amazi igihe cyose wumvise uyashaka. Dore ibihe byiza byo kunywa amazi:
- Mu rukerera : Kubera ko umubiri w’umuntu uba wamaze igihe kinini utakira amazi, ni kunywa amazi bifite akamaro kanini kuko bituma amazi yiyongera mu bice by’umubiri. Kunywa amazi mu rukerera kandi bituma umubiri ukanguka, bituma umubiri usohora uburozi kandi bikongerera imbaraga urwungano ngogozi.
- Mbere yo kurya : Nk’uko byavuzwe, ibi bishobora gufasha mu igogorwa ry’ibiryo mu gihe amazi yanyowe mu minota mirongo itatu (30 mins) mbere yo kurya.
- Mbere yo kwiyuhagira: Kunywa amazi mbere yo kwiyuhagira cyangwa koga bishobora kugabanya umuvuduko w’amaraso.
- Mbere yo kuryama : Kunywa amazi mbere yo kuryama bituma habaho gukumira ibura ry’umwuma mu mubiri rishobora guterwa n’uko umuntu aba amaze amasaha menshi asinziriye.
Src : www.passeportsante.net
