Abantu barakangurirwa kujya bisuzumisha indwara ya Cancer hakiri kare nibura buri mwaka, kugira ngo bamenye uko bahagaze, kuko iyo umenye ko uyirwaye mbere, ubasha kwivuza kare kandi ugakira.
Madame Phillippa Kibugu Decuir ni Umunyarwanda warwaye Cancer, avuga ko kubera ko yayisuzumishije kare akabimenya yabashije kwivuza kandi arakira.
Aragira ati: “Nnjyewe nari mfite mukuru wanjye wayirwaye iramuhitana, kubera ko atayizuzumishije mbere ngo amenye uko ahagaze. Nanjye rero nagiye kwisuzumisha nsanga ndwaye Cancer y’ibere, ntangira kwivuza ku buryo nari mfite abaganga 7 bankurikirana, baramvura none maze imyaka 30 narakize iyo ndwara. Nkaba nkangurira buri muntu wese ibi bintu bigeze muri 3: Kwikunda, Kwimenya no Kwisuzumisha kuko nibwo tuzagira ubuzima bwiza.”
Dr Uwinkindi François ni Umuyobozi ushinzwe kurwanya indwara zitandura zirimo na Cancer mu Kigo cy’ Igihugu gishinzwe Ubuzima (RBC), avuga ko umubare w’abarwaye Cancer ugenda wiyongera kuko mu mwaka wa 2007 bari 650 naho mu mwaka wa 2024 ni 5300 bashya barwara cancer ariko ngo ubushobozi bwo kuyisuzuma bwarazamutse.
Ati: ” Imyaka 10 ishize twagiraga Raboratwari 1 gusa yabashaga gupima Cancer, ariko ubu dufite Raboratwari zigeze muri 5 kandi umuntu wabashaga kuyipima yari umuntu 1, ariko ubu dufite abagera kuri 22 duhugurira mu Rwanda, badufasha kuyipima. Rero ubushobozi bwo kuyisuzuma bwarazamutse. Ikindi twashyizeho n’ uburyo bwo gukusanya amakuru ku ndwara za Cancer ku bantu bose baza kwivuriza mu bitaro byo mu Rwanda. Rero yaba abagabo cyangwa abagore ni ngombwa kwihutira kujya kwa muganga kwisuzumisha kuko rwose iravurwa igakira, iyo uyivuje kare itarakwira umubiri wose, kuko kugira ngo ukire ni uko uba wivuje kare.”
Minisitiri w’Ubuzima; Dr SABIN Nsanzima avuga ko 1/2 cy ‘abantu barwaye Cancer mu Rwanda baba batabizi.
Aragira ati: “Cancer iza ku mwanya wa mbere ni Cancer y’ inkondo y’umura, ariko twizeye ko mu minsi iri imbere izagenda icika kuko hari urukingo rwayo cyanecyane ku bana b’abakobwa. Rero mu myaka 2 iri imbere, izaba imaze kurandurwa. Iyindi ya yakabiri ni Cancer y’ ibere itwara ubuzima bwa benshi, ariko iyo igaragaye kare iravurwa igakira ku kigero cya 80%. Iyi rero umuntu ashobora kwipima nkuko tubyigisha, utubyimba duto tuza mu ibere umuntu akaba yatwivuza tugakira, uretse ko hari n’imashini zipima nubwo zitarakwira hose mu ntara.”
Yakomeje agira ati: “hari n’izindi Cancer nk’iya prostate ku bagabo ndetse no kubandi bafite kuva ku myaka 30 na 40 . Uretse izo hari na Cancer yo mu muhogo ndetse na Cancer y’igifu akenshi ziterwa no kunywa inzoga n’itabi. Uturemangingo duhindura isura n’ imikurire yatwo tugatangira gukura mu buryo budafite gahunda tukazabyara utubyimba, tugahinduka Cancer.
Zimwe mu mpamvu zishobora gutera Cancer harimo kunywa itabi ndetse n’inzoga wongeyeho no kudakora Sport, ariko izikomeye cyane ni Cancer y’inkondo y’umura na Cancer y’ibere. Gusa iyi ndwara ifata urugingo urwo arirwo rwose, ariko 80% mu kuzipima byagezweho . Mu bitaro bipima Cancer harimo: Ibitaro bya Kanombe, Ibitaro bya Butaro n’Ibitaro bya CHUB. Gupima Abanyarwanda Cancer bikaba bigeze ku gipimo cya 25%.
Miliyoni 19 z’abantu babarurwa buri mwaka ku isi yose, abarega miliyoni 10 zirabahitana. Mu Rwanda buri mwaka habarurwa abarenga 5000, abasaga 900 zirabahitana .
Insanganyamatsiko y’uyu mwaka wa 2024 iragira iti: “Isuzumishe Cancer hakiri kare kuko Cancer nyinshi zivurwa zigakira iyo zisuzumwe hakiri kare.”
Yanditswe na Mujawamariya Josephine
