Ubusanzwe kubira ibyuya ni uburyo bwerekana imikorere myiza y’umubiri. Hari abantu usanga babira ibyuya mu kwaha, mu mutwe, mu ntoki cyangwa mu birenge. Nubwo ibyuya ari ibintu bisanzwe, ariko hari ubwo bikabya ku buryo umuntu yumva agomba kubirwanya.
Kubira ibyuya hari ubwo biza mu gihe cy’ubugimbi cyangwa ubwangavu, bikazongera kugaruka nyuma y’imyaka 40 ndetse n’igihe cyo gucura (ménopause) ku bagore.
Kubira ibyuya bishobora guterwa n’impamvu zitandunye: Gukora imyitozo ngororangingo, ni kimwe mu mpamvu zatuma ubira ibyuya, kuko igihe wayikoze ushobora kubira ibyuya inshuro 10 z’uburyo wajyaga ubira ibyuya bisanzwe.
Ushobora kandi kuba ufite ikizamini cy’akazi (interview) cyangwa se ukagira ikindi kintu gituma ugira ubwoba. Ibi bishobora gutuma uhangayika cyangwa ukumva ufite impagarara muri wowe. Icyo gihe, imvubura zo mu ruhu zihita zikora ibyuya ndetse n’imisemburo igenga ugutera k’umutima igahita yiyongera noneho ubushyuhe bukazamuka bigatera umuntu kubira ibyuya.
Hari ubwo kandi bishobora kuba indwara y’uruhererekane (maladie héréditaire). Ushobora kandi kubiterwa n’imiti runaka waba waranyoye. Niba ukunda kubira ibyuya hari inama wakurikiza ukabirwanya:
- Irinde kurya ibiryo birimo ibirungo byinshi ndetse n’inzoga nyinshi. Kafeyine nayo ni ukuyirinda kubera ko yongera “adrenaline” itera kubira ibyuya.
- Jya wambara imyenda ituma uruhu rubasha guhumeka neza. Inama nziza ni ukwambara imyenda ikoze mu ipamba cyangwa mu budodo busanzwe.
- Tekereza niba buri munsi wakoresha “deodorant” zirinda kubira ibyuya.
Icyo wakora mu gihe wabize ibyuya, ugomba koga neza ugacya kandi ukihanagura neza kugeza wumutse kugira ngo udatuma bagiteri zigutera kugira impumuro mbi. Biriya byose twavuze hejuru ubonye ntacyo bigufashije wakwihutira kujya kwa muganga.
Murakoze,nabazaga niba umuntu abigira cyane mumaso kdi atakoze Sport mbese agahora ayaga yakora iki,
Yajya kureba muganga w’uruhu
Murakoze cyane kabisa ! Ubutaha muzaturebere impamvu hari abantu usanga bafite ibyuya bifite impumuro mbi cyane!
Yego.